لمني في محجر عيونك حبيبي وخلني
خلني أشوف نفسي في عيونك وأطمأن
دامك إستلهمت بالرمش الظليل تفلني
لعن أبو ذا الرمش كيف إني من أسبابه أجن
حبك إللي تل قلبي من بعد ماتلني
صدق أنا ميت في حبك كانها عيونك كفن
إجمع إللي باقي مني شتات ودلني
شوفني ذاك الغريب إللي يدور عن وطن
صدك إللي هد حيلي والجفا لي علني
ليه قلبين المحبه بالمحبه ماإلتقن
قلت أبصبر والصبر من زود صبري ملني
قلت أبنسى وأثر طيفك صار له عقلي سجن
ضاعت دروب المحبه والحزن ماظلني
يا حسافة ذي الليالي بالليالي ما انصفن
لا تهل دموع من عينك أخاف تهلني
خايف أطلع من عيونك لا من فيوم بكن
من أشعار "فزاع" : الشيخ حمدان بن محمد بن راشد آل مكتوم
