**~~~تعودني عليك~~***

تعودني عليك أيام أبد ما أفارقك ليله

واذا عنك أروح اليوم أقول لك نلتقي باكر

تعودني على لطفك وأسلوبك وتدليله

وتتوقع أنا بحيا بدونك يوم بتسافر

أنا ما ودي أشكي لك ولكن قلت الحيله

أليمه فرقتك والله وأنا ع البعد مب قادر

دخيلك أجل الموعد اذا تقدر ع تأجيله

دخيلك حط دمعاتي في عينك قبل ما تسافر

يا شين الوقت في بعدك دقيقه كنها ليله

شيصبرني وأنا أحبك ومثلك في البشر نادر

تعلق قلبي بقلبك يسمع منه ويحكي له

تدلل قول بس إطلب أقول لك غالي وحاضر

أنا مدري اذا قلبي رفض يصبر شسوي له

تخيل حالتي بعدك أنا إتحطمت ع الآخر

أكلم نفسي فغيابك ألوم القلب وأشكي له

وأصبر نفسي بالقوه وأقضي الليل وأنا ساهر

تلاقينا فبعض صدفه سولف لي وأنا أحكي له

ومن أول نظرة حبيته وصرت لشوفه أبادر

ذبحني السحر فعيونه يا ويله قلبي يا ويله

أنا أفهم لغة العيون ولكن صرت مب قادر

أنا أتمنى قبل لا يروح يلمس دمعي منديله

أبيه يحس بإحساسي أبيه يقول لي تامر

أبي حضنه يدفيني خليل يودع خليله

وأقول بصوت به شهقه..فمان الله يا مسافر

وأرجع م المطار وحدي يشلني الهم وأشيله

شيصبرني أنا شهرين وهو بس توه مسافر

عزاي إنه أخذ قلبي في وسط عيونه يشيله

وأنا أصبحت في بعده وحيد وأكسر الخاطر


من قصائد الشاعر المبدع طارق المحياس