ابيع عمري(عزل )

رحلت أبحث عن الذكرى وتهت بعالم النسيان

بغيت أبحث عن الفرحه وطحت بقبضة أحزاني

بغيت أكابر بوقتي وأعاند لوعة الحرمان

قنصت بطيري وطيري رحل عنّي وخلاني

رسمتك للهنا صوره كتبتك للوفا عنوان

ضحكت وكل ما فيني بكى حسره وبكّاني

وفيت وللأسف شفتك معاهم يوم قالو خان

قسم بالله ما سوّى سواتك بي عدواني

لك الله كل ما فيني بأحاسيسي مع الوجدان

وقف مذهول قدّامك ويسأل ليه تجفاني

غديت بلوعتي كنّي عزيزٍ جرّب الحقران

وقفت أستنكر الموقف وأموت بهم نكراني

وأنا اللّي كنت لامنّك تعبت أسامرك سهران

أعاند وقتي القاسي وأعدّك حسبة إخواني

تحدّيت الزمن لأجلك ولاني حاسب لما كان

ذكرتك ما دريت إنّك إذا إني غبت تنساني

طويت الهم لعيونك وذقت من العذاب ألوان

جزاي الدمع بعيوني تحدّا حرمة أجفاني

نزل دمعي من الحسره وعانق حسرة الأوجان

مثل حالي مثل مجني عليه وضيّع الجاني

مثل مركب بدى يغرق ولاله للأسف ربّان

مثل ما تبكي حروفي عذاب القاصي الداني

مثل تيّار من لوعه تصادم مع شموخ إنسان

مثل جرحٍ بدى ينزف نزيفه زاد وأعياني

كأنّي فارسٍ سيفه تكسّر داخل الميدان

وحيد وعيني تناظر عيون جموع عدواني

أشوف الموت لكني ألوذ برحمة الرحمان

أنادي وأطلب المولى بعد ما صار ياقاني

وأنا اللّي رحلتي صارت غموض بعالم النسيان

بعد ما رحت للفرحه وطحت بقبضة أحزاني