السلام عليكم ورحمة الله وبركاته
إلى أعضاء قروب ابو نواف ولكل شخص مسؤول
في كلية التربية لإعداد المعلمات قسم رياض أطفال
مراسلتكم من الرياض انقل إليكم هذا الخبر
تعرض في يوم 8-6-20006 المبنى الرئيسي لقسم رياض الأطفال وعلم النفس لحادثه إهتزاز مريبه حيث حصل شرخ كبير في الدور الثالث وقبل ذالك بعشرين دقيقه
دخلت إحدى طالبات شعبه آخرى تخبرنا بأن محاضراتنا جميعها ستنقل للمبنى الجنوبي للكليه وقد أثار شكوكنا التغيير المفاجيء في القاعات الدراسيه
حيث ان قاعات المبنى الجنوبي دائما مشغوله وتحضر بها محاضرات تقريبا جميع اقسام الكليه (نظرا لعدم وجود قاعات ليتم الدارسه بها ولا تتوفر الشبكة سوى في بضعة مباني)
الإهتزاز حصل في المحاضره الأخيره حيث كانت تقام في هذا المبنى محاضرات شبكة لأقسام رياض الأطفال واللغه العربية والغريب أنه لم تصبح هناك اي مشكلة في الشبكة طيلت السنوات
الماضيه ولكن في هذا اليوم تضايق كثيرا الدكتور بسبب سوء المايكروفونات التي تصدر ضجيج غريب وفي الساعه ال11 و 5 دقائق سمعنا صراخ بعض الطالبات وهن ينزلن من الدور الثالث
وقد كانت قاعتنا آن ذاك في الدور الثاني حيث كانت هناك مشرفة الشبكة تراقب الكشف لتوقيع الطالبات رغم أن هناك مسؤوله أخبرتها بضرورة إخلاء المبنى الفوري والسريع إلا أنها تجاهلت الموضوع بحجة أن على الطالبات التوقيع لكشف الحضور ولم تخبرنا بالسبب الحقيقي وأنه يجب علينا الإخلاء فورا بل كذبت علينا وقالت أنه سيدخل عمال رجال للكشف على المبنى ولا يجوز لنا البقاء لأنهم رجال (لاحظوا بس ما اعرف بس مين قالهم أن أعمارنا 10 سنوات عشان نسمع كلام غبي زي كذا ) ومنعتنا من السؤال أو الخروج بل الجلوس والسكوت حتى يمر الكشف على الجميع ولكن الوضع خرج عن السيطره فخرجت الطالبات جميعا وسط الزحام والتجمهر حول المبنى وقد حضر حارسات الأمن متأخرات (مالهم شغله إلا يقولون تنورتك فيها فتحة بلوزتك فيها صورة ودخلي جوالك ول ترا ناخذه منك ) وحاولو التاكد من أن المبنى خالي من الطالبات وحاولو إبعاد الطالبات عن المبنى من الخارج تماما
ملاحظة:
أول من هرب أعضاء هيئة التدريس وخاصه الأجنبيات وحده من الدكتورات رمت كيستها وعفشها على صاحبتي وهربت وقعدت مسكينه تدور بالكليه عشان تدورها وتعطيها عفشها
ولاحظوا انهم نسوا ان فيه طالبات في المبنى ونسوا موضوعنا نهائي
وسألنا بالضبط والتفصيل وش الموضوع فقالوا انه صار شرخ في قاعه في الدور الثالث وأن المبنى اهتز
درسنا في المبنى هذا سنتين ونص وكنا نلاحظ إهتزاز بالأرض لمن الطالبات يمشون
وحسيت فيها بشكل قوي لدرجة أني مسكت كرسيي لمن وحده من الطالبات استأذنت للخروج في وحده من المحاضرات وكانت تمشي بالوسط وكانت الأرض تحتي تهتز وبقوه
وثاني شي
ان الأرض غير مستويه ولا هي مسطحه
المبنى قدييييييم جدااااااا لكنه محدث من جوا ومصبوغ ومضبط ولاحظوا أننا إحنا يا طالبات رياض أطفال الي دافعين من فلوسنا يوم النشاط البيئي ألي على مستوى الكليات في الرياض لأجل تصليح الديكور الداخلي للمبنى
وفيه بنات وربي هم بانفسهم كانوا جالسين يرسمون على النوافذ ويجددون المبنى >> هذا غير صندوق الطالبات الي ماخذ من مكافئتنا في سنه اولى بالهبل وين هذي راحت ؟؟؟
غير هذا المبنى كثييييير من المباني في الكليه آيله للسقوط وتعبانه وعندنا القاعه الكبرى ذي رايحة فيها
لدرجة أنه ايام المطر ينزل يقطر علينا من السقف وتصير الأرضيه كلها مويه ووحل وقذاره
دورات المياه في الكلية سييييييييييئه وفيه تسرب فضييييييع للمويه وين وزارة المياه عنهم ؟؟؟
لدرجة أن الغرفه تصير طافحة وفيه تسرب في الساحه الخارجيه عند أنابيب المياه
غير ان فيه انخفاس قوي في الساحات الخارجيه وبعض البالوعات مفتوحة يعني يابنات انتبهوا وانتو تمشون لا وحده يصير لها حادث عبور
بكل اختصار فيه دورات مياه غير صالحة للإستعمال البشري
وفيه قاعات وخاصه قاعات الدراسات الإسلامية وقاعة الصرف ومبنى المصلى غير صالحة وعملية الإخلاء فيها ضروريه جدااااااااااا خوفا على حياة الطالبات
يا مسؤولين وزارة التعليم نوجه شكوانا إليكم
اعتبرونا بناتكم
أعضاء هيئة التدريس والإدارة تبع الكليه سوو كل شي يقدرون عليه على حسب إمكانياتهم وقدراتهم ما قصروا لكن المشلكه جذرية ويحتاج لها حل جذري الصيانه لوحدها معد تنفع
لكن وزارة التعليم وش سوت عشانا ؟؟؟؟؟؟؟؟؟؟؟؟؟؟؟؟؟
للعلم أنه لحد الآن ما جانا أي خبر زي باقي الكليات بالنقل إلى جامعة البنات بجانب كلية الآداب وكلية الأقسام العلمية
لييييييييييه كل هالتأخير
تنتظرون أحد يموت لين تتصرفون ؟؟
ليه مباني الجامعات بهالسوء والتسيب ؟ كل واحد تجيه مناقصه فيه كم مليار ما يفكر بمصلحة الجماعه وبنات الناس بس يهمه ياخذ بجيبه عشان يسافر برى ويدرس عياله هناك ويخلينا إحنا يا بنات الديره وإحنا في دولة تعتبر من أغنى دول العالم ليه مبانينا بهالسوء؟؟؟ ليه تجيبون أرخص عمال وأرخص بلك وأرخص سمنت ؟؟؟؟ ليه مافيه رقابه علينا كل واحد يعطي المسؤليه للثاني ؟؟
ليه مافيه إدارة كاملة تشيك بين فتره وفتره على المباني التعليمية ومدى سلامتها على ابناء وبنات هذا الوطن الغالي ؟؟؟؟؟؟؟؟؟؟؟
ليه مافيه إدارة مختصه للمباني هي التشرف على بنائها خله ياخذ سنين وهو ينبني وبأغلى الأثمان لكن المهم أنه يبقى فتره طويله وعليه صيانه شهريه
ليه مافيه واحد من هالمسؤليه الي قاعدين على كراسيهم يقوم ويشيك بنفسه على مباني الكليات عشان يشوف بام عينه ويتخيل ان وحده من بناته قاعده تدرس في مكان مقرف مثل هذا ؟؟
ليه لمن ينبني المبنى ما ينبني على اساس أنه راح يظل سنوات وسنوات عايش ؟؟؟ لكنه ينبني بأرخص الإمكانيات
شوفوا جامعة يال و هارفرد و كامبردج وإكسفورد في أمريكا وأوروبا
شوفوا كيف حتى انها صارت تحفه تاريخيه رائعه كل انسان يحلم انه يدرس فيها مبنية على اساس قوي انها راح تظل لأجيال وأجيال
ليه هالجامعات ما تكون بالنسبه لنا قدوة
فرحانين بس بجامعة الملك سعود وخاصه حقت البنات الي في عليشه الي رايحه فيها حتى الكلاب الشارده تعيش داخلها (تصوروا)
معقولة هذا حال جامعتنا وكلياتنا في السعودية ..؟؟؟؟؟؟؟؟؟؟؟
وأحنا عارفين أن مباني جامعة البنات الجديده بتكون أردى وكلها كم سنة ويصير فيها شي الله يعلم
لأن الرقابه على هالمسؤلين مافيه !!! أجل الرقابه تكون على مين ؟؟ على الضعفاء والمساكين؟؟؟؟
ارجوا البحث في الموضوع والاتفاق على حل فوري وعاجل (على الأقل شي مؤقت) قبل لا تروح أرواحنا
وسؤالي الأخير الي كله تساؤول وغموض نتمنى من قلوبنا نلقى رد شافي
ليه وزارة التعليم مهمله البنات والمعلمات ليه كل التركيز على الإهتمام في الشباب وعلى مبانيهم وتخصصاتهم وإحنا طيب ؟؟؟؟؟؟؟؟؟؟؟؟؟؟؟؟
العالم وصل القمر وإحنا في كليات وجامعات لو صفقت بيدك كان انهدت فوق روسنا
-----------
في كل الأحوال الحمد لله على سلامتنا وسلامة فرقتنا سنة رابع رياض اطفال .. وشكرا لجريدة الرياض لتفاعلها معنا وقت الحدث واشكر المحرره غزيل العتيبي لأنها هي الي ردت علينا لمن اتصلنا بعد الحادث بدقائق
واستفسرت منا عن الموضوع بشكل دقيق
March 12, 2006, 06:31 AM
مشاركة: اهتزاز في كلية التربية لإعداد المعلمات 
النمط الخطي
