المجلة الإلكترونية - مركز تحميل - القران الكريم - اتفاقية الاستخدام - تصفح الجوال - الاعلان - أضفنا في المفضلة

اشترك في مجموعة اصدقاء مجله الابتسامه البريديه الان
البريد الإلكتروني:

العودة   مجلة الإبتسامة > الموسوعة العلمية > معلومات ثقافيه عامه > السياحة و السفر

السياحة و السفر معلومات سياحية , السياحة العربية,سياحة حول العالم


تجول في أندونيسيا مناظر حلوه

السياحة و السفر


مشاهدة نتائج الإستطلاع: مرأيك بأندونسيا من خلال قرأتك لموضوع؟
جميله ومنظرها رائعه 4 100.00%
غير جميله وهناك أجمل 0 0%
المصوتون: 4. أنت لم تصوت في هذا الإستطلاع


جديد مواضيع قسم السياحة و السفر

إضافة رد

كيفيه ارسال موضوع جديد
 
LinkBack أدوات الموضوع انواع عرض الموضوع
قديم June 25, 2008, 11:26 AM   رقم المشاركة : 1
معلومات العضو
20006
بزعل على فراق الناس لي






20006 غير متصل

Tongue تجول في أندونيسيا مناظر حلوه


أندلوسيا .. أندونيسيا .. أندونوسيا .. أندومي العمة .. الي وده يسميها يسميها ويآخذ راحته .. !!


بسم الله الرحمن الرحيم

بين أسراب الطيور .. وكثيف السحاب .. من أعالي المرتفعات ..وفسيح البحيرات .. وتعدد الشلالات ..
إنطلقنا إلى أندنوسيا .. (سحر الطبيعة الاستوائية) ..
جبال و هضاب .. سحبٌ وأمطار .. طبيعةٌ خلابة .. ومناظر براقة .. لا تملك الا أن تقول سبحان الله ..
هكذا رأيناها .. لم نتصور أن تكون هكذا .. لكن إكتشفنا مالم نتوقع

ابا كبر يا ماس
معناها : كيف الحال يا رجل

أندلوسيا <<< كما يسميها أحد الشباب ..
دولة ال 1000 جزيرة ..

كانت التخطيط في هذا الصيف الذهاب إلى جنوب أفريقيا .. لكن لم تتيسر من فيزا وغيره .. مع أن الأمور كانت سهله وميسره .. الا أن التأخير منا .. !!
ثم جاءت الفكرة إلى أندنوسيا .. تم الترتيب للرحلة .. من حيث الحجز والتذاكر وأماكن الزيارات .. ومعرفة عامة عن المدينة ..

حجزنا عن طريق مكتب سعد للسفريات يوم الأحد الموافق 26/8/2007 والعودة بإذن الله 8/9/2007
تكلفة الحجز ب 2470 ريال ذهاب وإياب ..

تم ترتيب الأغراض والعفش .. ثم إنطلقنا من مطار الدمام إلى مطار أبو ظبي ..



ومن ثم إنتظار ساعه تقريبا .. ومن ثم إلى جاكرتا ..



على الجميع ربط احزمة المقاعد

طبعا الطيارة كانت رائعه جدا .. من الدمام الى أبو ظبي .. واستبشرنا غير .. ويوم شفنا الطيارة الي الى جاكرتا ..
قلنا هذي أولها .. الله يستر من تاليها .. بس أحلى نومه في الطياره برعاية بندول نايت ...

طبعا الوجبات الي قدموها لنا الله بالخير .. ما ودي أتكلم عنها علشان ما أتذكرها ..



الحمد لله وصلنا الى جاكرتا .. وفي المطار أول ما نزلنا .. رحنا نفيز .. والحمد لله خلصنا آخر ناس .. خخخخخخ <<< شنسوي أول مرة نروح لها ..



ما كنت في يوم من الأيام أفكر مجرد التفكير أني أروح للديرة هذي .. بس سبحان الله .. شيء بصراحه ما توقعناه أنه تكون البلد بالشكل هذا ..

عبينا الورقة حقت الجمارك .. وختموها وعطونا الكعب حق الورقة .. هذي الورقة حقت الجوازات .. لازم تدبسها في الجواز .. لأنها مهمه في الرجعة .. ولا تعرض لمسآئله .. 

بعد ما خلصنا الفيزا .. جونا حقين هديه هديه .. بس انهم شوي والحمد لله .. وصرفناهم وكملنا وعلى الجوازات .. ويستنى نعطيه هديه .. ولا عطيناه .. صحيح عطلنا شوي .. بس مو مره ..
أخذنا العفش .. وحجزنا سيارة تودينا فندقنا الي حجزناه .. فندق منهاتن .. فندق راقي ورائع وجديد .. وسعره أيضا رائع .. طبعا من مكتب حجزناه .. واحد يقاله عرفان .. عطانا رقمه واحد من الشباب بالدمام ما قصر ..
00162811990974( عرفان .. ) يتكلم العربية بطلاااااااقه .. ماشاء الله عليه .. لكن الظاهر ان مكتب الكاها أرخص أسعار منه ..
اذا ما لقيت عرفان عندك مكتب كاها .. أفضل مكتب يظبطك وأرخصهم ..
أخذنا تكسي من مكتب سيلفر بيرد .. رائع جدا .. وسعره الي وصلنا اياه للفندق 100700 سعر رائع .. طبعا السيارة سدرك ..

وصلنا للفندق






.. عطيناهم الحجز .. والتأمين على السكن .. ودخلنا الغرفة ..

الغرفة بصراحه رائعه .. بس يعيبها صغر حجمها .. كون ان حنا 3 أشخاص .. طبعا أنتكبنا .. عطونا سرير مزدوج وسرير مفرد .. بس أحلى نومه على الأرض .. خخخخخخخخ .. جايين تعبانين ..



منظر رائع من مسبح الفندق .. ويظهر فيه العمارة المتطورة في هذا البلد ..






أول ما وصلنا نزلنا الأغراض والعفش ..

وطلعنا على مجمع أتريوم بلازا مجمع حلو .. وعبارة عن 7 أدوار ..





طبعا أول شيء رحنا نصرف الفلوس الي معنا .. ( نصائح : لابد أن تكون الفلوس جديدة وغير مطويه لأنها تفرق في الصرف غير كذا صرفنا بالريال السعودي أفضل من الدولار .. لأن رمضان جاي .. والعالم كلها جايه لمكه ) طبعا اذا كانت خردة .. يعني أبو 5 ريال وأبو عشرة ريال وأبو ريال .. أفضل من الدولار .. فقط الخردة

أفضل صراف في الدور الثالث في نفس المجمع لون المحل أزرق بعد محلات الذهب .. وطبعا المحل صغير .. لكنه أفضل شيء وهذا كلام ناس خبره في الصرف ..


طبعا يفرق معك الصرف في كل يوم يوم يرتفع ويوم ينزل .. فأنت وحظك .. لكن اصرف جزء جزء ..



بعدها رحنا نشتري شرايح تلفون في القبو في نفس المجمع .. طبعا أفضل خط ما أخذناه حنا لأني نسيت وش اسمه .. لكن اسم أفضل شريحه هي
( بروكسل ) وبعدين ( سمباتي ) و ( ام ثري ) حنا أخذنا سمباتي وشحنا ب 100000 ربيه .. طبعا لأني نسيت اسم الشريحة في الفندق

وبعدين رحنا تعشينا في مطعم والله ما أدري وش اسمه .. بس مو زين .. لكنه فخم .. ويا بلاش .. أنصدمنا من الفاتورة الصراحه .. طلعت ب 33 ريال تقريبا ..

قلت والله أنه أرخص من الشاورما .. من جد المطعم فخم وديكور وشغل بس الأكل النوعيه هذي أنا ما أحبها .. بس تمشي الحال .. تقدر تقول أكل أندنوسي

مرينا البقاله في القبوا وأخذنا لنا بعض الحلويات ومويه وببسي وحركات .. ومشينا على الفندق ..

وبالنسبه للتكاسي يا جماعه .. الي اشوفه أحسن هو انك تقوله شغل العداد .. علشان ما تزعل أحد ولا يزعل منك أحد .. طبعا فتحتة العداد ب 5000 ربيه .. رجعنا الفندق .. وصلينا المغرب والعشى .. وجلسة حبيه وسواليف وسعة صدر .. وخلدنا إلى النوم .. النوم بدري كويس يا شباب ..


تلخيص النصائح :


• في موسم قبل رمضان خذ معك ريال ولا تآخذ دولار وحاول أن يكون الإصدار جديد لأنها تفرق في الصرف طبعا خردة ..
• خل الفلوس جديدة وغير مصفوطة لأنها تفرق بالصرف وخلك قبل الساعه 6 المساء عندهم علشان ما يسكر .. لأنه يسكر الساعه 6 المساء
• صورة من الجواز للتجول
• مع التكاسي أتفق معهم على العداد الا اذا كنت تبي تآخذه يوم كامل .. ويوم كامل ما أنصحك تآخذه الا وأنت طالع للجبل
• التعامل الحسن مع الجميع .. كي لا تتعرض لأي مشكلة .. المشاكل ببلاش هناك ..
• خط التلفون خذ بروكسل
• ثلاجة الفندق أسعارها دبل .. علشان كذا خذ لك من أطرف بقاله كل الي تبي
• التكاسي الي في المطار خذ أرقامهم كلها علشان اذا احتجتها وأنت طالع للجبل ولا شيء بتكون عليك أرخص
• فندق أتريوم الي جنب مجمع أتريوم بلازا أبعد عنه .. لأن فيه مشاكل وتجمعات عرب واجد .. وأنت جاي تغير جو .. يعني خلك بعيد حبك يزيد ..
• من أماكن الزيارة في جاكرتا : المجمعات المذكورة أسفل / عالم البحار ( مدينة أنتشل )




/ عالم الثلج / انتشل / موناس / مسجد الإستقلال /

هذي مجموعة فنادق ينصح بالسكن فيها اسعارها مابين 60$ الي 90$ دولار
1. Millennium Hotel (على شوفتي له انه فخم ) ارخص واحد 60 دولار
2. Park Lane Hotel
3. Crowne Plaza Hotel
4. Sari Pan Pacific Hotel (موقعة ممتاز)
5. Ciputra Hotel (الفندق هذا في وسط مجمع بس عيبه بعيد شوي)
6. Hotel Aryaduta (عيبه انه قديم شوي )
7. Mandarin Oriental Hotel (موقعه ممتاز)
8. منهاتنق جنب بارتلين 70 دولار .. جنب السوق هذا الي سكناه أول يوم
9. اريا دوتا كويس بس قديم ..

وهذي مجموعة ثانية بس انها اغلى ما بين 100$ الي 130$ دولار
1. JW Marriott Hotel (مقابل له مجمع اسمة امباسدور)
2. Shangri-La Hotel
3. Mulia Senayan Hotel (الفندق هذا فخم جداً جداً ... وهوا فندق الخطوط السعودية )

اما بالنسبة للمجمعات
1. Taman Anggrek Mall
2. Plaza Senayan
3. SOGO
4. Atrium Plaza
5. Plasa Indonesia
6. Mangga Dua (واحد شعبي و الثاني اجهزة إلكترونية )

مكاتب سياحية
Haryono
Jl. Kebon Sirih Raya No.9 K Jakarta Pusat 10340
Phone: 3920808 – 3921111
Fax : 3141937–3140891


LISA TOURS & TRAVEL
HOTEL GREN ALIA
JL. CIKINI RAYA NO. 46
JAKARTA PUSAT
TEL: 3928372, 3928358
FAX: 3928475
خليل عايش
Mobile.: 0812-8055522

سفارة المملكه العربيه السعوديه
Jl. M.T. Haryono Kav. 27
Cawang Atas, Jakarta Timur 13630
Tel (62-21) 801-1533, 801-1536, 801-1537
Fax (62-21) 801-1527


وخلص اليوم الثاني من السفر في الطريق وفي الترتيب للرحلة والنوم بدري كي تستعيد النشاط ..



[ موقف ]

مع نسمات الصباح .. بهواءٍ عليل .. وجوٌ يفوق الخيال .. إستيقضنا مبكرا في تلك الليلة .. وأردنا أن نُصلي في المسجد صلاة الفجر .. منذ أن خرجنا من الفندق .. وإذا بالهواء العليل يستقبلنا .. بفاتحةِ خير .. مررنا وسط تلك الدهاليز ووسط تلك الممرات .. لنصل إلى المسجد .. بصراحه كان الطريق مخيفا لكن كانت العزيمة على الصلاة في المسجد أقوى .. الحمد لله وصلنا إلى المسجد ..
المسجد كان غريبا في شكلة .. غريبة في وصفه .. رأينا قبورا بجوار المسجد .. وعلى الجدار معلقٌ صور لمن دُفنوا في تلك القبور .. وكما فهمت أنهم أأمة المسجد ..
ذهبنا إلى الجهه الخلفية من المسجد فوجدنا المغاسل على هيئة مغاسل مرتفعة أقرب ما تكون إلى المراوش ..
ونحن ذاهبون إلى المسجد .. نسمع أدعية وصلوات على الرسول الكريم .. وعندما وصلنا إنتظرنا لنرى ما هي تلك الطقوس الغريبة .. وانتهى المؤذن من الأدعية .. وقام بالأذان .. الحمد لله الأذان كما سمعته صحيحا .. لا إضافة فيه ولا نقص .. بدأ بعد الأذان بالأدعية من جديد والصلوات .. بصراحه كُنا مترددين بالصلاة خلفهم .. وهل الصلاة تُقبل ام لا .. لم نلبث في التفكير طويلا .. الا أُقيمت الصلاة .. وبدأنا بالصلاة معهم ..بعد الصلاة .. إذ بالأذكار الجماعية تبدأ .. والصندوق التبرعات يدور بين المصلين .. بصراحه عجبت لما رأيت .. وحمدت الله على ما نحن عليه .. وأننا بعيدين عن تلك البدع .. التي أسأل الله أن تكون بعيدةً عنا .. خرجنا من المسجد بسرعة .. بصراحه كُنا غريبين عن المكان .. والكُل ينظر إلينا .. والطريق مخيف .. توجهنا سريعا إلى الفندق .. نجاذب أطراف الحديث .. عما حصل لنا في هذه الليلة .. أكتب هذا الموقف وأنا خارج من صلاة الفجر يوم الثلاثاء المواقف 29/8/2007 في مدينة جاكرتا بأندنوسيا ..
لخصت هذا الموقف ب ( أندنوسيا آمال الأمة الإسلامية .. وخرافات الدين الإسلامي ) ..
أتمنى من جميع أصحاب الدعوة وخاصة الخارجية البث في النفوس الحرص على هدي المصطفى صلى الله عليه وسلم ..
قضينا ليلتين إضافيتين في جاكرتا بين التجول في المدينة لكن الضجيج والزحمه حتمت علينا الخروج منها إلى الجبل ..
من الأماكن التي زرناها .. تمن أنقرك .. منقا دورا .. أندنوسيا بلازا .. حديقة تمان ميني .. برج موناس .. أعلى برج في أندنوسيا في وسط حديقة ضخمه .. انتشل .. الكورنيش .. وبعض الأماكن لا أذكرها بالتفصيل
.. 



برج موناس



خريطة أندونيسيا في البرج .. وشرح عنها بالأندنوسي .. ولا فهمنا شيء



مطل من اعلى البرج على ساحة أندونيسيا



مسجد الإستقلال .. ماشاء الله المسجد كبير جدا .. ومبني على مواصفات إسلامية ..

يعني طول العمارة على عدد آيات القرآن .. والأعمده تدل على أركان الإسلام .. لا أدري هل هي تدخل في البدع أم لا .. !!






من المطاعم العربية الناجحه .. أكله مقبول ..




لي أكثر من 3 سنوات مشتهي هالمطعم .. وحنا رايحين له .. نط علينا واحد من الشباب قال ابي مطعم أبو نواس .. قالها يستهبل .. بس قلت ميخالف .. تبي نروح .. قال ايه نروح ..

قلت .. والله ما أردك .. صحيح اني مشتهيه من 3 سنوات .. بس تستاهل . . ورحنا ابو نواس ولقيناه مسكر .. وربك ما يضيع شيء .. بس ما تسوى عليه انه قال ابي ابو نواس .. والله يا شخلوووووه شخل .. كسر خاطري ..



إنطلقنا إلى الجبل ليلا .. ويفضل الذهاب نهارا كي ترى الطريق كما يذكره السائق أنه رائع ..
توجهنا إلى بعض الفلل الموجودة .. لم يعجبنا شيء .. استقرينا على فندق الياسمين



الفطور على المسبح من أروع الاماكن هدوءا وراحة .. !!

.. من الفلل الجيدة .. كوتا بونقا .. اللوتس .. قرين أبل .. نوفس .. كلها جيدة .. لكنها بعيدة عن المناطق السياحية ..



أحد الفلل

تجولنا في الجبل ..وكانت مرافقة لأحد الشباب تلك التي لا يستغنون عنها



الله يعين المدمنين عليها


في الطريق الى بعض المناطق تجد مزارع الشاهي تشكل أروع المناظر












بنهاية يوم مليء بالزيارات ..




من المناطق الرائعه جدا جدا .. تمان سفاري .. وتحتاج إلى يوم كامل للتجول ..
التجول مع الفيله .. والذهاب إلى الشلال .. والعروض .. ومفاجآت كثيرة .. تستحق الذهاب ..



















مشكلة الي الا يكتب عربي



طال الطريق وملنا الترحالُ ... الطريق من جد بعيد للشلال .. مشي تقريبا نص ساعه ..



هاه يسوى العنوه .. !!














العجيب ان المطاعم كلها تبيع الرز .. حتى المطاعم العالمين ماكدونالدز وكنتاكي




واليوم الثاني قضيناه في البراشوت .. ومنطقة الشلالات .. منطقة رائعه فيها أكثر من شلال .. مع أكل الذره المشويه .. بزيادة ملح ..  .. فعلا منطقة تستحق التعب .. متعبة في الصعود لكن تستحق العَنوة ..



في طريقنا الى البراشوت .. صورة لمسجد مجاور لها ..





منصة الإقلاع ..



الإقلاع



أثناء الإقلاع





أثناء الهبوط



نصائح :
• المنطقة الجيدة للسكن في الجبل هي منطقة تشبناس ومنطقة بونشاك
• المنطقة التي لا يُنصح السكن بها هي سي سرو
• الأسعار في الجبل مرتفعة .. فلا تستغرب أي إرتفاع في الأسعار .. خاصة البقالة السعودية
• في الجبل حاول إستئجار سائق وتتفق معه بيوم كامل ب 350000 ربية بحد أعلى .. والبنزين والضرائب عليك .. إذا كامل ب 500000 ربيه .. مع أني ما انصح
• أفضل مطعم عربي بصراحه المطعم السعودي
• حاول أخذ رقم أي سائق يجيد العربية .. ربما تحتاجة في أي وقت
• من المكاتب الموجودة ( لم أستخدمها ) مكتب أحمد بافقية 08129233142
• مكتب السلطان رقم التلفون 00622517141444
• فتح الخط من السعودية 0062 == واذا وصلت لأندنوسيا وتبي تكلم على تلفون أندنوسي 00162
• اذا لقيت أحد يسنعك غير المكاتب أتوقع أنه أفضل
• رقم سائق يجيد العربية بطلاقة ( بلهجه جداويه .. أيوا يبويا ) ( طاهر : 006281586662555 ) قله جايك عن طرف سعد
• للعوائل : الإتفاق مع شغالة لترتيب الفله وترتيب الأكل وتغسيل الملابس ... الخ ب 50000 ربيه بالكثير 75000 ربيه
• للتذكير / أي سعر تبي تعرفه بالريال السعودي أقسمه على 2400
• أماكن الزيارة : تمان سفاري / حديقة الزهور / البراشوت / الشلالات / الليدو / حديقة تشوبوداس
• أسعار الفلل الجيدة والنظيفة 500000 ربيه





سكنا

• في كل شيء حاول تكاسر .. ولزم على المكاسر .. والله يعينك
• تأكيد الحجز قبل 3 أيام من الرجوع .. لأن أندنوسيا زي جدة كلها نكبات ..
• سكنا في فله فلامنقو مدخلها أمام مقهى أبو عبدالله .. حليوه .. والليله بسعر 500000 ربيه طبعا يوم الإجازة .. تقدر تآخذها بأقل في غير يوم السبت والأحد ..
اليوم الثالث إستيقضنا صباحا .. وأفطرنا بالفيلا .. ومن ثم توجهنا إلى بحيرة الليدو .. منظر رائع .. لكن يعيبه طول الطريق وهو مكان واحد فقط ..




حتى ان حنا دخلنا حواري .. من الزحمه .. والله يعين ..





بيع الموز في وسط البحيرة .. كان لذيذا بحق ..!!

من أجمل الموز الذي ذقته في حياتي ..




ومن ثم رجعنا إلى الجبل وتغدينا في مطعم شاورما عربي .. وتقضينا المقاضي من البقالة السعودية



.. مستواه عادي جدا .. لكن أفضل من غيره .. من المطاعم العربية .. ومن ثم انطلقنا إلى منطقة شلالات أعلى الجبل .. أسمها تشيبوداس .. منطقة رائعه .. وتستحق العناء .. عِندما تكون مُستلقيا على تلك الصخرة الكبيرة .. وتستمتع بجو الرذاذ القادم من الشلال .. لا تستطيع وصف الجو الخيالي .. حقا من أراد الإستجمام والاستكشاف لا تفوته ..





















رجعنا بعد أن أضلمت العين .. وجلسه حبيه أخويه في الفيلا .. ومساج مع شخص .. أقل ما تقول أنه طبي ..!!
فعلا ان قيل مساج فهذا هو .. ولا دلع مساج الفنادق وب 50000 ربيه .. يعني 20 ريال
وعشى في المطعم السعودي .. وأحلى سواليف الى الساعه 1 بالليل .. تأخرنا في النومه ذيك الليله ..












موقف لتلك الليلة


هكذا تباع المرأة .. أين هي تلك الأصوات التي تنادي ب حرية المرأة .. فعلا هي عندهم سلعة تباع وتشترى .. ويا أسفي .. وهم مسلمون .. !!
كُنا جلوسا في حديقة الفله الصغيرة .. نقرأ قصةً فيها العبرة والعِظة .. نستفيد من تجاربها .. ونعلم ما يدور في هذا الكون من تجارُبٍ لإُناسٍ جربوا من تجاربها ..
عموما هذه القصة لمن يريد قرائتها .. ولم أكمل من قراتئتها ..
دخلنا علينا رأجل .. ومعه إمرأتين .. سلم علينا .. ومن ثم أتت المرأتين لتسلما فمنعناهما .. لما يأمر به إسلامنا .. قال لي أتريد الليلة .. أمسكته .. وقلت له أنت مسلم قال نعم .. قلت لماذا تعمل هذا .. قال لأكسب المال .. قلت الا تريد أن يبارك الله لك في المال وأن يرزقك الرزق الحلال .. كلمات من هنا وهناك .. بعد ثواني .. لم يعجبه الكلام .. يقول أنت مطوع .. يبغى زواج ما فيه مشكلة .. سبحان الله .. لا أقول سوى هدى الله البعض ممن يذهبون الى هناك زواج بنيه الطلاق .. زواج عرفي زواج ما أدري أيش .. والله عييييييييييييب عليكم يا شباب لا تشوهون الصورة ... وخلوا صورة الاسلام الصحيحه انتم القدوة لا تشوهوووووون الصورة .. والله أتكلم من حرقة .. يعني تلقى لك واحد ماشاء الله متيييييين .. وشكله مدري وش يبي .. وجنبه ذيك الصغنونه .. والله عيييييب

نصائح :
• بحيرة الليدو .. اذا كنت مطول بالجبل رح لها .. ولا ما تسوى العَنوه .. لكن تبقى حليوه
• مدخل الليدو ب 25000 ربيه .. لا تدخل مع المدخل الرئيسي .. فيه قبل المدخل بمسافه مهيب بعيده على نفس طريق المدخل قبلها على اليسار .. ناس يأجرون القوارب الخشبيه ادخل معهم وفاصلهم بالسعر ولا يآخذ عليك أكثر من 200000 ربيه .. طبعا يبي يدورك على مطاعم وأمور زي كذا .. عاد انت وذوقك .. حنا بصراحه ما طلبنا شيء .. دخولك مع المدخل الي أقولك عنه أوفر لك .. لأن الدخول ب 25000 ربيه .. واذا كنتوا 4 أشخاص يبي يصير ب 100000 ربيه .. وغير القارب الخشبي الساعه الوحده ب 200000 ربيه .. بس الي أقولك عنه يفر بك الين تمل ب 200000 ربيه .. بس ترى منتب مطول .. أذكرك .. بس لا يفوتك الموز الي هناك ..
• المساج يجيب لك اياه السواق طاهر .. واذا ما أخذته دق عليه وقله يجيب لك اياه .. في الفيلا أو أين ما تسكن
• منطقة الشلالات أعلى الجبل يبيلك تجيها بدري .. علشان توصل للشلالات كلها الكبيرة والصغيرة .. وحاول تدخل بالسيارة .. ولا تسوي فيها قوي وتدخل مشي علشان ما تتعب .. المكان بعيد .. خاصة الشلال الكبير يبيله ساعه مشي .. بعد الشلال العادي .. بدون دباب ولا سيارة ..
• حاول تجيب معك في منطقة الشلالات الي في اعلى الجبل العزبه والعلوم السنه واطبخ وانفخ هناك .. أحلى جو .. وأحلى مناظر .. ( حنا راحت علينا  )
• وناموا بدري ترى النوم زين .. 


بعد ما خصلنا من الجبل .. طلعنا الى منطقة اسمها باندونق .. جلسنا فيها يومين ..
اليوم الأول يوم الوصول .. رحنا ندور لنا سكن .. ولقينا فندق اسمه ايليفنتور .. حلو .. وفيه النت مجاني .. ماشاء الله الواير لس في الكفي تحت .. ويوصل للغرفة .. راح اليوم الأول تمشي في المنطقة .. من سوق وجلسه في الكفي .. ونت .. واليوم الثاني رحنا للبركان .. وهذي الصور الي تشوفونها للبركان ..
طبعا نزلنا تحت .. تقريبا مشي ساعه .. انا أشهد ان حنا ضعفنا من كثر المشي .. وحطينا رجولنا في المويه الكبريتيه الحارة .. يقولون انها علاج للروماتيزيوم .. وبعد ما خلصنا منها .. رحنا للبرك حقتهم يسمونها مويه بارد مويه حار .. طبعا بركه درجة حرارتها 40 درجة مئويه ويعرضون عليك مساج وتنظيف وما ادري ايش .. الزبده ان حنا دخلناها سريع سريع .. وخلصنا من باندونق




طريقنا للنزول الى الفوهه









درجة الحرارة للماء تفوق ال 40 درجة مئويه



مويه حار مويه بارد .. المكان الي يسبحون فيه العالم .. من الشلال نفسه ممتد الى كليوات الأمتار




رجعنا لجاكرتا ال 3 أيام الأخيرة .. قضينا يوم في السيي وورد والآيس وورد .. عالم البحار وعالم الثلج .. وخذنا لنا سفينه شراعية الله لا يوريك .. ومع الموج والزحمه .. جاء واحد يسحبنا بماطور .. قلت رجعونا بس .. اذا هذي أولها ينعاف تاليها .. وجلسنا في مطعم بندر جاكرتا .. مطل على البحر .. حق روقاااااان .. واليوم الأخير .. لترتيب الأغراض والذهاب الى المطار بدري ..



الطريق كان ممطرا الأيام الأخيرة ..



لعبة البلياردوا من أجمل الالعاب .. وفيها تجديد عن العادة .. وتعلم شيء جديد ..



عالم البحار .. صورة من الأحواض



اكتشف ما هذه الصورة ..!!



طلعنا بالقارب .. ورجعنا بسرعه .. لسوء الأجواء .. ولسوء القارب



مطعم بندر جاكرتا .. رايق في الجلسه .. ومطل رائع



لولا الله ثم هي ولا راحت عيونا من هالشمس .. الله يكفينا شر نار جهنم





ودعتنا الليالي الأندنوسيه بهذه المناظر .. على أمل اللقاء بها بأعوام أخرى ..





كلنا منطلقين في الرجعه نحو الشمس .. فالغروب طول ذاك اليوم .. !!





نصائح :
• لابد من تأكيد الحجز علشان ما تنتكب
• جاكرتا ما أنصح فيها أبد .. لأنها زحممممممه .. ونجلس في التكسي من 3 الى 4 ساعات علشان نوصل للمطعم

ختاما .. أتمنى أني أفدت من يريد الذهاب إليها .. وإعطاء فكرة عامه عنها ..

لا تنسونا من الدعاء ..

 

 




- شجرة غريبة الشكل
- سبحان الخالق: صخره معلقة في الهواء دون دعائم ...
- شاهد حلقة مسلسل نور ومهند بالصور الحلقه الأخيره
- الفلفل الحار' كنزمجهول'
- أخواني المشرفين والمراقبين







   رد مع اقتباس

قديم July 10, 2008, 01:59 AM   رقم المشاركة : 2
معلومات العضو
abu_dina
عضو مبتسم





abu_dina غير متصل

Thumbs Up رد: تجول في أندونيسيا مناظر حلوه


يعطيك العافيه

ومشكور على هالمجهود الرائع وأنا من زمان أفكر في إندويسيا

لكن بعد تقريرك الرائع قررت أروح


أكرر شكري وأمتناني لك











   رد مع اقتباس

إضافة رد

السياحة و السفر

السياحة و السفر



مواقع النشر (المفضلة)
المواضيع المتشابهه
الموضوع كاتب الموضوع المنتدى مشاركات آخر مشاركة
مناظر لا تحتمل khatim صورة و صور 9 July 28, 2011 06:59 PM
إن الحياة لن تدوم.. إذاً فلن تدوم أحزاننا hossamf18 علم البرمجة اللغوية والعصبية NLP وإدارة الذات 5 July 29, 2010 07:49 AM
تجول في أندونيسيا مناظر حلوه 20006 السياحة و السفر 0 June 25, 2008 11:25 AM
رحلتي في أبها مناظر حلوه دلوعة أبها صورة و صور 6 May 18, 2008 09:53 AM
## مناظر خلابة................## دمعت فلسطينية صورة و صور 3 December 25, 2007 11:42 PM


الكلمات الدلالية (Tags)
مناظر, أندونيسيا, تحول, حلوه
أدوات الموضوع
انواع عرض الموضوع


مجلة منتديات السوق الالكتروني المزيونة المسافر خياطة قصص الانبياء اقوال وحكم كلام من القلب تحميل كتب ثقافة عامة صور رمزيات اندرويد بلاك بيري ايفون تحميل برامج وصفات طبخ عالم حواء بحوث البرمجة اللغوية روايات مقالات طبية الطب البديل كلام حب عروض دورات
الساعة الآن 10:40 AM


Powered by vBulletin® Copyright ©2000 - 2014, Jelsoft Enterprises Ltd.
SEO by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر